Faraldur

Í vinnunni minni geysar nú faraldur.  Stórhættulegur.  Ég óttast þennan faraldur meira en allar svína og kjúklingaflensur.  Jebb.  Þetta er sko óléttufaraldur.  Og ég er í áhættuhópi.  Þið vitið, kona á barneignaraldri og allt það.
Hver sem maður lítur í vinnunni eru óléttar konur.  Þær eru þarna bara í hópum.  Ráfa um gangana. Sitja á fundum.  Bumbast í matsalnum.  Þær eru gjörsamlega útum allt. 
Og eins og það sé ekki nóg þá eru það allir strákarnir sem eiga von á erfingja.  Ræða frjálslega um fæðingarorlof og áætlaða fæðingardaga.  Ég svitna og fæ illt í magann.  Ó nei.
Það virðist svo enginn hafa áhyggjur af þessu nema ég.  Eins og yfirmenn okkar séu í móki.  Ekki í tengslum við raunveruleikann.
Og núna nýlega var sett upp spritt á öll klósett hjá okkur.  Svona til varnar svínaflensunni.  Ég bara skil þetta ekki.  Verjast svínaflensu en loka augunum fyrir faraldri sem geysar innan dyra hjá okkur.
Ég ætla að fara fram á að það verði sett upp pilluspjöld á öll kvennaklósett og sæðisdrepandi krem á karlaklósettinn.  Þannig getum við kannski náð að spyrna við fótum og stöðva þennan faraldur.

Athugasemdir

[Bibba (IP-tala skráð) 12.5.2009 kl. 18:19]

Já svo er líka hægt að kaupa sér eyju á Breiðafirði og vera þar í sóttkví, laus við alla smitsjúkdóma og lifa á hörpuskel og ígulkerjum :|

[Snjóka (IP-tala skráð) 12.5.2009 kl. 20:34]

Þessi faraldur er að ganga í vinnunni hjá mér líka, stórhættulegur faraldur og greinilega enginn með áhyggjur nema þú og svo ég

[Rebbý, 12.5.2009 kl. 20:50]

jahhh ekki í fyrsta sinn sem þú lendir heldur í vona faraldri ... smitaðist þegar við unnum saman í svona óléttufaraldri en það eru rúm 18 ár síðan það var

[Hrönn Sigurðardóttir, 12.5.2009 kl. 21:26]

Já en Vilma! Miðað við ástandið í dag tekur okkur það þrjátíu ár að ná 60 % af einhverju gegn vergri þjóðarframleiðslu! Hugsaðu þér hvað öll þessi börn létta undir skuldum okkar!

Ég segi: Fleiri börn! Fleiri börn!!