Alveg fullkomin!

22.9.2009 | 19:28

"Sko, hérna er ég með viðvörunarþríhyrning..", sagði ég ákveðnum rómi við skoðunarmanninn um leið og ég steig útúr Rúnu. Ég benti á rauðan fallegan lítinn plastkassa sem hvíldi á farþegasætinu, svo hélt ég áfram á meðan ég benti: "Þú sást hann örugglega ekki síðast þegar hann var í skottinu svo ég setti hann hér".

Skoðunarmaðurinn gjóaði augunum á blaðið sitt. Jú jú, bíllinn kominn í endurskoðun. Síðast fékk ég athugasemd á að hafa engan þríhyrning.. ætlaði sko ekki að láta nappa mig á því aftur svo ég hafði komið þríhyrningi líffræðingsins fyrir á vel áberandi stað.

Ég sá að maðurinn gjóaði augunum aftur á blaðið. Aha. Örugglega að spá í þessu með kúluna og rafmagnið fyrir hana. "Ég lét fjarlægja kúluna", sagði ég og benti aftur fyrir Rúnu. "Já já... þá þarftu að láta afskrá hana", svaraði skoðunarmaðurinn og góndi þar sem kúlan átti að vera. "Afskrá? Hvar?", spurði ég steinhissa. Fékk svo að vita að ég gæti bara sinnt því erindi þarna á staðnum og áður en ég vissi af var skoðunarmaðurinn sestur við tölvu og hamaðist við að afskrá kúluna. Fyrir vikið borgaði ég 1300 krónur.

Ég skil reyndar ekki af hverju þarf að borga 1300 krónur fyrir að afskrá kúlu af bíl. Ég meina hvað er innifalið í afskráningunni? Sævar tók kúluna af og rukkaði ekkert fyrir það. Kúlan er enn í skottinu svo ekki er gjaldið fyrir að farga henni. Og af hverju 1300 krónur? Hvað liggur á bak við verðleggingunni?

En skítt með það, kúlulaus og afskráð, þetta er alveg nýtt líf. Svo benti skoðunarmaðurinn mér á að setjast bara og slaka á. Sennilega orðinn leiður á því að láta mig benda á það sem átti að endurskoða. Ég settist en fann litla eirð í mér. Mér finnst kvöl og pína að fara með bílana mína í skoðun. Kvöld og pína.

Skoðunarmaðurinn dundaði sér við að skoða framljósin og rúðuþurrkurnar. Ég hélt mér í stólinn og beit í tunguna á mér. Kommon! Það var búið að skoða þetta! En best að leyfa honum að sýna hvað hann kann fyrir sér í skoðun. Loksins komið að því að skoða jafnvægisstöngina. Spennan í hámarki... og hibba bibb barbabrella! Nýr miði á Rúnu! Skoðun án athugasemda! Yeahhh....

Þessi dagur varð þó til að ég rifjaði upp fyrri skoðunarferðir sem stundum hafa verið skrautlegar. Til dæmis fékk ég einu sinni skoðun án athugasemda á Bubba minn gamla, þrátt fyrir að vera með slit í jafnvægisstöng og vantaði peru. Ekkert verið að horfa á svona smámuni... og að lokum bað skoðunarmaðurinn mig um að líma vinsamlegast brettin á bílinn minn og mælti meira að segja með góðu límbandi!

Flokkur: Bloggar | Facebook