Það er Daloon dagur í dag...

"Já, komdu bara til okkar! Við tökum fagnandi á móti þér", svaraði viðskiptavinurinn glaðlegur í símanum um leið og hann náði andanum aftur eftir hláturskastið. Það er ekki slæmt á þessum síðustu og verstu að ég geti skemmt viðskiptavininum svona. Mér var nefnilega alls ekki skemmt... eða þannig. Ég ákvað að nota tækifærið og klaga herbergisfélaga mína í viðskiptavininn. Hún hló og hló þegar hún heyrði hvað gekk á hjá okkur.

Sko málið er að í morgun ákvað "herbergisráðið" að halda aðalfund í hererginu okkar, þar sem meirihlutinn (það eru sko þau tvö hin) ákvað að taka aftur upp refsingar í herberginu okkar. Já, og hverjum á að refsa? Mér auðvitað! Já, nú eru komnar refsingar við að syngja Daloon lagið. Og þessar refsingar eru settar á mér til höfuðs. Ekkert annað.

Sko, ég viðurkenni fúslega að ég hef haft þetta lag illilega á heilanum. Síðan í febrúar. Ég syng það þegar ég er leið og það er erfitt. Þá geri ég þetta meðvitað til að reyna að gleðja mig og létta lundina. En það sem er kannski verra er að ég syng lagið, hátt og hressilega, þegar ég er glöð og hamingjusöm og þá geri ég það alveg án þess að taka eftir því sjálf.

Glerlistakonan horfir á mig og segir: "Þetta er svo innilega gleðilegt hjá þér, þú ljómar öll og brosir útaf eyrum og brestur í söng.. ÞEtta er greinilega hamingjutengt." En svo snýr hún sér að líffræðingnum og veitir því atkvæði sitt að refsa mér fyrir sönginn. Og refsa mér harðlega.

Ég viðurkenni alveg að kannski er þreytandi að hlusta á einhvern syngja sama lagið á 10 mánuð, án þess að hann taki eftir að hann syngi það helminginn af tímanum. Allskonar útgáfur af laginu. Í allskonar útsetningum. Já, ég trúi alveg að það sé ekki skemmtilegt en mér er bara ekki sjálfrátt.

Og þá segir líffræðingurinn að þessi refsing sé tekin upp af umhyggju fyrir mér. Til að bjarga mér frá sjálfri mér. Meðferðin á að taka þrjár vikur og þá á ég að vera orðin laus við lagið úr kollinum. Dagurinn í dag var erfiður og ég er strax komin í skuld við herbergisfélagana.

Og því var ég svo ánægð þegar viðskiptavinurinn hringdi. Viðskiptavinurinn sem er umboðssölumaður Daloon vorrúlla á Íslandi. Ég hef setið dag eftir dag hjá þessum viðskiptavini og sungið lagið hátt og hressilega fyrir þau svo hún veit svo sem alveg hvað herbergisfélagarnir eru að ganga í gegnum. En samt hló hún og bað mig bara um að koma og syngja svolítið fyrir þau, svona um leið og hún lofaði að tékka betur á hvort hún ætti ekki bara gömlu auglýsinguna svo ég gæti spilað hana í vinnunni. Svo tók hún undir að þetta væru ósanngjarnar refsingar og lífið væri ekki sanngjarnt... enda vill hún að ég syngi þeggar sem hæst, sem oftast og sem víðast... enda gangandi auglýsing í leiðinni.

Athugasemdir

[Rebbý, 13.11.2008 kl. 09:56]

ohh skil þau vel, nú er þetta komið enn og aftur á heilann á mér svo vinnufélagar mínir kaupa Daloon í kvöld þegar farið verður í búðina

[Snjóka, 13.11.2008 kl. 12:26]

Mikið hlýtur þú að vera orðin þreytandi fyrst að glerlistakonan ljúfa greiðir atkvæði á móti þér

Mátt annars alltaf syngja þetta lag fyrir mig, er hvort sem er alltaf öðru hvoru með þetta á heilanum líka þó að ég bresti ekki kannski í söng

[Hrund (IP-tala skráð) 13.11.2008 kl. 21:23]

Nú er ég komin með þetta á heilann, eftir að hafa lesið þessa færslu!!!

[Bibba (IP-tala skráð) 16.11.2008 kl. 17:39]

Geturðu ekki bara fengið eitthvað annað lag á heilann í staðinn.   Tilæmis Pósturinn Páll.   Ég er viss um að þau grátbiðja þig um að syngja Daloon lagið eftir bara nokkra daga :)