Ég er það bara ekki! Tapsár það er að segja...

Ég hringaði saman bleiku perlufestina og kastaði henni eins fast og ég gat í skellihlægjandi líffræðinginn. Svo náði ég hörðu kúlunni sem sálfræðingurinn gaf mér um daginn og mundaði hana. Sölumaðurinn skellti uppúr og hafði vit á að stinga af úr herberginu. Ég skil ekki hvað fólk er alltaf að segja að ég sé tapsár. Því ég er það ekki. Bara alls ekki.

Líffræðingurinn hefur mikið gaman af því að rifja endalaust upp þetta eina skipti sem við spiluðum saman Partý og co. Hans lið vann. En þau svindluðu líka. Vildu ekki fara eftir réttum reglum og beygðu svo reglurnar og teygðu til þar til þau dæmdu sjálfum sér sigurinn. Eftir þetta kvöld var ég nærri búin að henda spilinu.

Sko ég hef oft spilað þetta spil við aðra vini mína og þá vinn ég alltaf. Enda svindla hinir vinir mínir ekkert. Ég er einfaldlega bara aðeins betri í að spila en þau.. svo ég vinn... Svo er ég líka svo óheppin í ástum, því fylgir sjálfkrafa að vera heppin í spilum. Og það er ég.

Svo var það keppnin síðustu helgi. "Jói & the girls" liðið hafði grunsamlega oft rétt fyrir sér. Grunsamlega oft. Ég meina, það gat ekki verið að þau væri betri en mitt lið. Er það? Og ég hef eftir nokkuð áreiðanlegum heimildum að ekki hafi verið farið alveg reglunum. Ekki allavega eins og ég myndi hafa haft reglurnar. Og svo er mér strítt á því að vera tapsár! Það er líka svindl.

Sko í alvörunni. Okkar lið var alveg rosalega gott sem sýndi sig í sérstaka bikarleiknum sem var leikinn eftir "upphitunarleikinn" sem Jói & the girls svindluðu út sigur á. Við möluðum alveg bikarleikinn og ég hlusta ekki á eitthvað bull um að við höfum svindlað í þeirri viðureign... nei, þeir sem saka okkur um það hafa eitthvað óhreint í pokahorninu.

Svo er það þetta með keppnirnar á vordögum fyrirtækisins. Mín lið taka heiðarlega þátt, það er meira en ég gat sagt um lið líffræðingsins. Það tók viku að ná aftur friði í herberginu okkar eftir þessa keppni. Ég ætla nú ekkert að tala mikið um þetta hér... en sko... vonbrigði þessa síðasta vordags voru skátarnir. Eiga þeir ekki að vera voðalega eitthvða heilbrigðir og heiðarlegir? Ha? En nei... ég vildi að það væri til svona yfirskátaráð þar sem ég gæti kært þessa skáta sem sáu um leikina síðast. Þeir bara gáfu liði líffræðingsins þetta bjánalega viðurkenningarskjal (sem mig langar ekkert í by the way) svo hann gæti endalaust setið og montað sig af því. Flottu verðlaunin sem mitt lið vann standa svo fyrir framan bjánalega viðurkenningarskjalið (sem mig langar enn ekkert í) og skyggja á það.

Helst vil ég spila við kattadómarann og kennarann. Þau vinn ég alltaf. Og hef gaman af. Meira! Meira! Og svo spilum við trekant, póker eða eitthvað borðspil. Þau tapa. Ég vinn. Bara alveg eins og það á að vera! Þau taka því reyndar misvel að tapa. Við erum öll með mikið keppnisskap og oft falla grimmileg orð á meðan leikar standa sem hæst. Eftir stendur svo sigurvegari (ég) sem skellihlær og taparar sem gráta.

Það er bara einn sem ég er sátt við að tapa fyrir og það er prinsinn minn. Hann er afskaplega lunkinn í spilum og einstaklega heppinn (sonur hennar mömmu sinnar). Og ég er til í að tapa fyrir næstu kynslóð.. svona stundum allavega

Athugasemdir

[Rebbý, 30.9.2008 kl. 00:02]

já - man nú bara ekki hvernig það hefur farið þegar við höfum spilað saman, en örugglega hefur þú unnið enda mér svo slétt sama - var kennt að það sem skiptir máli er að vera með enda ekki til keppnisskap í mér hvað svona bull varðar

[Vilma Kristín , 30.9.2008 kl. 00:13]

Sko... einhvern veginn hefur spilaskapur hjá okkur yfirleitt endað í blaðri :) við náum eiginlega ekki að klára...

[Hrund (IP-tala skráð) 30.9.2008 kl. 19:12]

He he he ég hef nú stundum verið ásökuð um svindl! Sérstaklega í Yatzee, man eftir sumum sem töpuðu all rækilega þá!! He he he og öskruðu svindl!!! Svo þú getur ekki sagt að ég tapi alltaf!!!!! En ég er auðvitað ekki með keppnisskap frekar en sumir..... það eru bara ákveðnar manneskjur sem svindla og svindla og segja svo að þeir séu óheppnir í ástum!!!

Annars verðum við að fara að hittast og spila fljótlega ég sakna þess mikið

[Vilma Kristín , 30.9.2008 kl. 19:54]

Jebb, Hrund. Alltof langt siðan síðast... gott að vita að það er enn til fólk sem vill spila við mig :) Búum til "deit" fljótlega!

[Bibba (IP-tala skráð) 30.9.2008 kl. 20:48]

Jæja, búið að taka tapið út á fambanum (líffræðingnum).
Þá er líklega óhætt að fara að láta sjá sig í vinnunni :)