Ekki - orðabók tengdamóðurinnar

Heimasætan á kærasta, "Gamla".  Hann er svona frekar nýr í sögunni, ef þið skiljið hvað ég á við.  Allavega... í öllum framkvæmdunum síðustu vikurnar hefur heimasætan verið kyrrsett heima og því fylgir að kærastinn er að sniglast í kringum okkur.   Heppin við, því þetta er hinn prúðasti piltur.  Hann var auðvitað drifin í hin ýmsu verk, allt frá uppbyggingu ljósakrónu til endurröðunar í geymslunni þegar liðið var fram á nótt.

Hins vegar á ég til að gleyma því að heimilislíf okkar er nokkuð frjálslegt og samskipti okkar heimasætunar og samskiptin við vini og bræður geta oft virst nokkuð hömlulaus.  Kaldur húmor og óskert hreinskilni getur virst hálf brjálæðisleg í augum utanaðkomandi.  Það er því hætta á að maður gangi framaf saklausum og ungum gestum sem ekki þekkja okkur mikið.

"Mamma, þú mátt ekki segja eitthvað svona eins og þú gerðir í gær þegar Gamli er nálægt", skipaði heimasætan mér að morgni.  Tryggði sig svo betur með því að leggja Rebbý línurnar seinni partinn.

Ég vil auðvitað ekki skelfa drenginn eða verða þess valdandi að hann hljóti varanlegan skaða svo ég er farin að útbúa "ekki" orðabók... eða svona "ekki" umræðubók fyrir tengdamæður eða jafnvel "ekki" hegðunarbók.  Vonandi get ég seinna gefið hana út og þar með orðið öðrum tengdamæðrum til hjálpar.

Hér kemur smá sýnishorn:

Ekki ræða um handjárn og hentugar festingar í hillusamstæðu
Ekki ræða miðfætur og göt
Ekki syngja hátt með unglingatónlist og reyna að dansa með
Ekki spila kántrí tónlist og heimta að unglingarnir syngi með
Ekki ræða um leður  g - strengi stóra bróður þíns
Ekki ræða um geymslutíma smokka
Ekki segja frægðarsögur frá unglingsárunum
Ekki segja "krúttlegar" og vandræðalegar sögur af eigin unglingum
Ekki spyrja "Hverra manna ertu?"

Athugasemdir

[Rebbý, 21.7.2008 kl. 19:43]

hahahaha  dreptu mig núna .... varð vitni af öllum þessum ósköpum og það er rétt þá má ekki leggja þetta á "gamla" því hann er bara allt of sætur og ljúfur strákur til að fæla hann frá.
Ætla bara að nota tækifærið ef brósi þinn les bloggið og minna á að hann átti að mæta í leðrinu (g-strengnum) í ljónapartýið  vona bara að "fíllinn" passi í g-ið

[Bibba (IP-tala skráð) 23.7.2008 kl. 10:01]

vesalings baddnið :)