Vinsælasti sjúklingurinn

20.6.2008 | 21:56

Vinsælasti sjúklingurinn

"Þú verður að muna svo eftir að taka lyfin! Allan skammtinn!", sagði ofurglaði læknirinn í símanum. Hann hafð næstum náð mér í rúminu, umhyggjusamur og kátur læknir sem hringdi í mig frá Landsspítalanum í morgun. Hann vildi bara tékka á mér. Hvað heita sýklalyfin sem ég var að taka? Var ég dugleg að taka þau? Og ítreka svo aðeins við mig mikilvægi þess að hlýða öllu sem þeir sögðu. Eftir smá spjall kvaddi ég káta lækninn og hélt af stað í vinnuna.

"Hmmm... þetta fer að verða dularfullt. Ætli einhver hafi klagað mig fyrir að fara í vinnuna?", hugsaði ég seinni partinn þegar annar og enn hressari læknir hringdi í mig frá Landsspítalanum. Ég er sko ekki venjulega svona vinsæl. Þessi vildi endilega fara yfir greininguna með mér, fara yfir lyfjagjöfina og mikilvægi þess að fara eftir fyrirmælunum. "Og hvernig líður þér svo? Eru einkennin að minnka?", spurði hann og ég heyrði hann brosa í gegnum símann. Í huga mér var hann eins og læknarnir í sjúkrahúsrómantísku bókunum. Þið vitið, karlmannlegur, með spékopp, hárprúður... en samt örugglega nokkuð ungur. "Heyrðu! Ég er bara svaka hress! Allt annað líf...", svaraði ég og brosti líka í símann. "Frábært!", hrópaði hann og hélt svo áfram: "Þá er ég líka hress! Svona á þetta að vera!". Ég hló við og kvaddi ofurhressa lækninn. Enn samt að velta fyrir mér hvernig stendur á því að önnum kafnir læknar á yfirfullum spítala virðast ekki hafa neitt annað að gera en að hringja í mig. Annað hvort er ekkert að gera hjá þeim eða nýrnasýkingin mín er svona agalega spennandi.

Eftir að hafa lagt á seinni lækninn einbeitt ég mér að akstrinum. Ég var í heilsuleiðangri, á leið að hitta Snjóku og ofuráhugasama grasalækninn sem vildi klárlega laga mig líka. Hver veit nema grasalæknar fari að hringja í mig líka? En öll vinnan síðustu daga, þrammið um miðbæinn og grasalæknaheimsóknin hafa dregið úr mér allan mátt. Með hækkandi hita, máttleysi og yfirþyrmandi þreytu lagðist ég fyrir þegar ég kom heim.... ég ætla að leyfa mér að vera veik í kvöld og held svo bara áfram að vera hress á morgun... bíð spennt að sjá hver hringir í mig þá...

Flokkur: Bloggar | Facebook