Þar sem fuglarnir syngja

5.5.2008 | 22:59

Þar sem fuglarnir syngja

Í gærkvöldi sofnaði ég við söng í furðufugli. Jebb, heimasætan kíkti á myndbandið sem sýndi skemmtiatriði deildarinnar minnar á árshátíðinni og var fljót að fá annað lagið á heilann. Svo dreif hún sig í sturtu og söng þar hástöfum. Kom úr sturtu, enn syngjandi. Fór inní herbergi að hanga í tölvunni án þess að sleppa úr takti úr laginu. Já, hún var gjörsamlega komin með Moskvunætur á heilann. Af öllum lögum í heiminum fær hún rússneskt lag á heilann. Reyndar mjög fallegt rússneskt lag.... Minnti dálítið á mig og líffræðingin þegar við heltum okkur útí gagnasöfnun fyrir skemmtiatriðið og sungum bara rússnesk lög í viku... En ég er sko ekkert að kvarta það var bara notalegt að sofna við sönginn hjá litla furðufuglinum mínum.

Í morgun vaknaði ég og trítlaði fram. Og mér mætti söngur. Kannski ekki rússneskur en skemmtilegur söngur engu að síður. Perla söng og söng...ja, eða kallaði í búrinu sínu. Trúls tók undir með sinni undurfögru rödd og raddaði því lagið með henni. Kíkí hafði sig svo sem lítið í frammi en eftir smá tíma heyrðist smá píp í henni, hún kom inní lagið sem svona bakraddarsöngkona. Það er ekkert eins hressandi og að koma fram úr og beint inní fulglasöng.

Í vinnunni tók svo næsti fugl við og raulaði fyrir hin ýmsu lög í dag og náði á endanum að senda mig heim með alveg nýtt lag á heilanum. já, söngurinn fylgir mér um allt... ekki leiðinlegt það!

Flokkur: Bloggar | Facebook