Heilsuvika í austri

12.3.2008 | 18:08

Tjörvi horfði á okkur borða í hádeginu og ákvað þar og þá að hafa heilsuviku á Egilsstöðum þessa vikuna. Hann stökk af stað og við hin sátum eftir og kláruðum matinn, maður á alltaf að klára matinn sinn. Svo mættum við aftur uppá skrifstofu og beint í heilsuviku Tjörva. Og þetta er eiginlega ósköp ljúft. Ég er reyndar enn að bíða eftir nuddinu og jóganu, fer eitthvað lítið fyrir því, en það hlýtur að koma. Heilsuvika á Egilsstöðum er nefnilega framkvæmd þannig að Tjörvi fjárfesti í ávaxtaská, fyllti hana af mangó, appelsínum, eplum, bönunum og vínberjum og staðsetti hana á milli mín og líffræðingsins þar sem við situm og deilum einu borði. Svo sker Tjörvi niður mangó og setur á borðhornið hjá okkur og opnar pakka af heilsukexi og treður líka á milli okkar. Sækir glös og gefur okkur sódavatn. Til að fá okkur til að borða eplin fjárfesti Tjörvi í eplaskera, agalega sætum. Ég og líffræðingurinn leggjum okkur fram við að taka þátt í þessari heilsuviku Tjörva eða svona þvingað-eftir-hádegi-heilsuátak Tjörva, bætum því ofan á ráðstefnusetuna – en við erum hér á okkar eigin ráðstefnu “OWAS í austri 2008”. Nú er bara ein lítil sneið af mangó eftir, pínulítið af vínberjum því þau sem við höfum ekki borðað sjálf hefur nakti forritarinn matað mig á. Já, ég er viss um að það var ekki svoleiðis á heilsuvikunni í bænum… Það er hinsvegar spurning hvað þvingaða-eftir-hádegi-heilsuátakið gerir fyrir okkur, annað en að skila kannski betri hægðum. Við höfum sennilega aldrei borðað eins mikið á ævinni, þar sem við sitjum næstum ofan á ávöxtunum. Það fer eitthvað minna fyrir að heimamenn liggi í þessu… enda er svo langt fyrir þá að sækja heilsukostinn.

Flokkur: Bloggar | Facebook