Jólajólademantur

"Er þetta ekki fallegt?", spyr prinsinn mig og heldur svo áfram með glampa í augunum: "Þetta er demantur!"  Ég brosi útí annað og samsinni honum, jú, þetta er óskaplega fallegt. Svo tek ég við skrautinu og prófa að halda á því og láta það dingla, sit og stari á það hugfangin.  Prinsinn minn er dálítið fyrir skrautlega og litríka hluti, veit ekki hvaðan hann hefur það.  Ég gat því ómögulega neitað honum um jólaskraut sem honum langaði svo mikið í, bleikt úr hálfgagnsæju plasti til að hengja upp í loftið.  Við erum búin að dingla þessu fyrir framan okkur í kvöld og sjá hvernig heimurinn verður svo miklu skemmtilegri ef maður horfir í gegnum "demantinn".

Jebb, við prinsinn skelltum okkur í leiðangur í dag.  Jólainnkaupaleiðangur.  Ekki að kaupa mat, ekki að kaupa gjafir. Nei, við fórum í þeim tilgangi að skoða jólaskraut bæjarins.  En aðalega til að athuga hvort við fyndum jólatré sem okkur langaði í.  Prinsinn var alveg í essinu sínu og gefur mömmu gömlu lítið eftir við skoðun á glingri, því skrautlegra því betra.  Við fundum ekkert fallegt jólatré, íslendingar eru aðeins of hefðbundnir í jólatrjám.  En í staðinn varð ég að standa illa á bremsunni til að eyða ekki öllum peningunum í jólaskraut.  En ég keypti samt pínulítið nýtt.  Eins og skraut fyrir stofuljósin, og gangljósið, og aðeins meiri hengiskraut, og jólatréskraut, og sætar styttur, og jólahandklæði og seríustand... Það var alveg fullt fullt í viðbót sem mig langaði í en ég var mjög ákveðin við sjálfa mig.  "Nei, Vilma! Þetta gengur ekki... það er enn tæpur mánuður til jóla og fullt af tækifærum til að draga meira skraut heim...", sagði ég við sjálfa mig í höstum róm og inní mér stappaði ég niður fætinum líka til áherslu.  JólaskrautsVilma setti upp skeifu og lagði frá sér spiladósina sem hana langaði svo, snéri sér við og rak augun í svo ósköp fallegan fugl sem færi svo vel á hvíta jólatrénu... "Nei! Settu fuglinn niður... Þú fékkst að kaupa músastytturnar... slepptu þessu..." og jólaskrautsVilma lagði frá sér glerfuglinn með fjaðrastélið og hélt heim á leið með nokkra poka en ekkert nýtt jólatré

Athugasemdir

[Rebbý, 28.11.2007 kl. 23:05]

uss  skal lána þér tréð mitt - það kemst eiginlega ekki fyrir í litlu stofunni minni - þrátt fyrir að ég hafi verið búin að finna íbúðina síðustu jól þá keypti ég of stórt tré
en já - það er auðvelt að tapa sér algjörlega í jólaskrauts innkaupum - förum EKKI saman í bæinn fyrir jól

[Snjóka, 28.11.2007 kl. 23:09]

Ef ég sé bleikt jólatré í Mekka jólaskrautsins, þá dreg ég það með mér heim

[Bibba (IP-tala skráð) 29.11.2007 kl. 19:11]

Bíddu, hvað varð um bleika jólatréð sem þú keyptir í fyrra ... eða var það í hittifyrra ?
Og hvar ætlarðu að koma fyrir einu jólatrénu enn ?
Áttu ekki þrjú ?
Var ég voða leiðinleg núna ?

[Vilma Kristín , 29.11.2007 kl. 19:54]

Sko.... ég á BARA tvö - eitt hvítt og eitt grænt með ljósleiðara... ekkert bleikt ennþá.  Og það er bara það sem ég verð að eignast... bara verð...

Tveggja daga yfirlega á netinu er vonandi að skila mér fallegasta bleika tré í heimi...  sjáum hvað gerist